Fyrsti dagur Heimsmeistaramótsins í MMA fer fram í dag. Bjarni Kristjánsson keppir þar fyrir Íslands hönd og mætir Breta í dag.
Mótið er haldið af alþjóðlega MMA sambandinu, IMMAF (International Mixed Martial Arts Federation). Þetta er í þriðja sinn sem IMMAF stendur fyrir heimsmeistaramóti en keppt er samkvæmt áhugamannareglum þar sem óleyfilegt er að vera með reynslu úr atvinnumannabardaga.
Sjá einnig – Bjarni Kristjánsson: Ég ætla bara að koma heim heimsmeistari
Bjarni keppir í léttþungavigt eða 93 kg flokki. Mjölnismaðurinn mætir Bretanum James Harrison í dag en keppni hefst kl 17 í dag á íslenskum tíma. Keppnin í dag klárast á miðnætti á íslenskum tíma og líklega mun bardagi Bjarna vera frekar seint í kvöld. Bjarni er 11. bardagi dagsins í búri 1 eða næstsíðasti bardagi dagsins í því keppnisbúri samkvæmt vefsíðu IMMAF.
Samkvæmt MixedMartialArts.com er Harrison með tvo sigra og tvö töp sem áhugamaður. Hann er blátt belti í brasilísku jiu-jitsu og kemur úr 10th Planet BJJ skólanum í Bretlandi. 10th Planet var stofnað af Eddie Bravo og er þekkt fyrir að nota mikið af óhefðbundnum uppgjafartökum.
Sigurvegarinn mun svo mæta Rússanum Igramudin Ashuraliev á morgun en Rússinn situr hjá í fyrstu umferð.
