Dana White, forseti UFC, var augljóslega mjög pirraður út í Kelvin Gastelum í gær. Bardagi Gastelum og Cerrone var sleginn af borðinu eftir að Gastelum náði ekki tilsettri þyngd.
Donald Cerrone og Kelvin Gastelum áttu að mætast á aðalhluta bardagakvöldsins á UFC 205 í nótt. Donald Cerrone vigtaði sig inn snemma í vigtuninni í gær en Kelvin Gastelum lét ekki sjá sig. Gastelum var tíu pundum yfir 170 punda veltivigtartakmarkinu og gat íþróttaráð New York fylkis ekki leyft þeim Cerrone og Gastelum að mætast.
Þetta er í þriðja sinn sem Gastelum nær ekki veltivigtartakmarkinu og hefur Dana White lofað því að hann muni aldrei aftur berjast í veltivigt.
.@UFC Prez @DanaWhite is NOT happy with @KelvinGastelum for missing weight. Hear from the boss himself what he plans to do about it. #UFC205 pic.twitter.com/luVhm8sXyt
— FOX Sports: UFC (@UFCONFOX) November 11, 2016
Donald Cerrone var auðvitað mjög svekktur sjálfur enda fær hann ekki að berjast á þessu sögulega kvöldi. Cerrone fær þó borgað fyrir að mæta en missir af 150.000 dollurum að eigin sögn.
Cerrone er þó strax kominn með annan bardaga en hann mun mæta Matt Brown á UFC 206 í Kanada þann 10. desember.
