Egill Øydvin Hjördísarson keppir til úrslita í kvöld á Evrópumótinu í MMA. Egill mætir Pawel Zakrzewski en hvað vitum við um hann?
Zakrzewski hefur unnið þrjá bardaga á EM í léttþungavigtinni í ár og þá alla eftir dómaraákvörðun. Hann keppti á HM í sumar í Las Vegas en þar datt hann út í fyrstu umferð fyrir manninum sem fór alla leið í flokknum.
Á EM í ár hefur hann unnið Robin Enontekio frá Svíþjóð, Robin Larsson einnig frá Svíþjóð og Paolo Anastasi frá Ítalíu.
Jón Viðar Arnþórsson, einn af þjálfurum Egils, hefur séð smá af Zakrzewski og telur hann ætla að halda bardaganum standandi. „Hann virðist vilja boxa. Ef hann boxar við Egil verður það stuttur dagur enda Egill skuggalegur striker og alls staðar bara,“ segir Jón.
„Það er bara hrikalegt fyrir mig að hita upp með honum. Það er alveg nógu óþægilegt, hvað þá að þurfa að berjast við hann.“
Zakrzewski er 6-1 sem áhugamaður samkvæmt Sherdog gagnabankanum og hafa tveir bardagar unnist á uppgjafartaki. Egill er sjálfur með átta sigra og eitt tap sem áhugamaður í MMA.
Bardaginn fer fram um 20-21 leytið í kvöld og vonandi kemur Egill með gullið heim.
