Gunnar Nelson féll niður um eitt sæti á styrkleikalista UFC í veltivigtinni. Hann og Thiago Alves höfðu sætaskipti þrátt fyrir að hvorugur hafi barist um helgina.
Nýr listi er birtur um það bil 36 klukkustundum eftir hvert bardagakvöld. Gunnar er því sem stendur í neðsta sæti nýjasta listans en efstu 15 áskorendunum er raðað á eftir meistaranum í hverjum þyngdarflokki fyrir sig. Þeir Gunnar og Alves gætu þess vegna haft sætaskipti aftur eftir næsta UFC bardagakvöld þrátt fyrir að hvorugur sé með bardaga á næsta leiti.
Veltivigtarmeistarinn Robbie Lawler hélt beltinu sínu eftir sigur á Carlos Condit um helgina. Annars er lítið um að vera í veltivigtinni á næstu vikum og fáir topp 15 bardagamenn sem berjast á næstu vikum. Helst ber að nefna bardaga Johny Hendricks (#3) og Stephen Thompson (#9) á UFC 196 í næsta mánuði og bardaga Tarec Saffiedine (#10) og Jake Ellenberger í lok mánaðarins.
Annars er Jon Jones kominn aftur í efsta sæti listans yfir bestu bardagamenn heims pund fyrir pund en áður var Demetrious Johnson í efsta sæti.
