Boxarinn Kolbeinn Kristinsson mun berjast sinn sjötta atvinnubardaga þann 4. júní. Bardaginn fer fram í Kaupmannahöfn á stóru bardagakvöldi.
Kolbeinn Kristinsson (5-0) mætir Dananum Kim Thomsen (4-0) sem á gríðarlega farsælan áhugamannaferil að baki. Thomsen er enn ósigraður sem atvinnumaður og verður þetta erfiðasti andstæðingur Kolbeins hingað til.
Kolbeinn sigraði sinn síðasta bardaga snemma í fyrstu lotu í Finnlandi. Fyrir þann bardaga dvaldi Kolbeinn í Finnlandi í æfingabúðum með þungavigtarmanninum Robert Helenius.
Sjá einnig: Kolbeinn – Toppurinn er ekki bara fjarlægur draumur
„Í seinasta bardaga þá rotaði ég andstæðinginn strax í fyrstu lotu og var varla byrjaður að svitna þegar bardaginn var búinn. Ég fann að undirbúningur minn fyrir hann var gríðarlega góður og upplifði skýrt að ég var kominn upp á næsta stig,“ segir Kolbeinn í fréttatilkynningu.
„Núna er ég búinn að vinna fyrstu fimm bardagana mína og þess vegna er verið að para mig á móti andstæðing sem er á uppleið. Ég óttast þennan andstæðing hins vegar ekki neitt. Ég er í frábæru formi og er fullviss um að það verður höndin á mér sem verður upprétt þegar bardaganum lýkur.“
Danski umboðsmaðurinn Mogens Palle stendur fyrir bardagakvöldinu en hann hefur haldið box bardagakvöld með stjörnum á borð við Muhammad Ali, Mike Tyson, Lennox Lewis, Evander Holyfield og fleirum. Það er því stórt tækifæri fyrrr Kolbein að berjast á bardagakvöldi hjá Palle.
Kolbeinn mun halda til Danmerkur á föstudaginn þar sem lokaundirbúningurinn fyrir bardagann fer fram. Bardaginn fer fram í hinu fornfræga húsi Frederiksberg Hallen í Kaupmannahöfn þann 4. júní.
