Magnús Ingi Ingvarsson fær titilbardaga í FightStar bardagasamtökunum í apríl. Bardaginn fer fram sama kvöld og Bjarki Þór mætir Alan Procter aftur.
FightStar Championship 9 bardagakvöldið fer fram þann 29. apríl í London. Upphaflega átti bardagakvöldið að fara fram þann 22. apríl en mótshaldarar þurftu að færa kvöldið um viku. Bardagi Bjarka Þórs og Procter er endurat eftir að bardagi þeirra endaði með umdeildum hætti í desember.
Magnús Ingi mun berjast um léttvigtarbelti FightStar á kvöldinu en hann mætir Hascen Neri Gelezi. Gelezi býr í Frakklandi en er sagður vera frá Saudi Arabíu á Sherdog með aðeins einn bardaga. Gelezi er svart belti í júdó og er eflaust með fleiri bardaga en skráðir eru á Sherdog.
Bardagabræðurnir munu því berjast sama kvöld þann 29. apríl líkt og þeir hafa svo oft gert áður.
