UFC er komið aftur af stað eftir mánaðarpásu. Um helgina fengum við bardagakvöld í Rotterdam í Hollandi þar sem Alexander Volkov sigraði Stefan Struve en hér eru Mánudagshugleiðingar eftir helgina.
Aðalbardagi kvöldsins var skemmtilegur slagur í þungavigtinni þar sem Alexander Volkov kláraði Stefan Struve með tæknilegu rothöggi í 3. lotu. Þetta var þriðji sigur hans í jafn mörgum bardögum í UFC og er hann hægt og rólega að klifra upp listann.
Hið endalausa vandamál augnpota lét sjá sig í bardaga þeirra. Struve potaði tvisvar í augu Volkov í 2. lotu og slapp með skrekkinn í bæði skiptin. Dómarinn Marc Goddard tók ekki stig af Struve heldur gaf honum viðvörun í bæði skiptin. Það er sífellt verið að tala um augnpotin en ekkert virðist ætla að breytast. Struve hélt opnum lófanum fyrir framan andlit Volkov ítrekað og var í raun bara heppinn að pota ekki oftar í augu Rússans. Það er búið að segja þetta margoft en harðari refsingar við augnpotum verða að sjást oftar í búrinu. Það virðist alltaf borga sig að svindla þar sem bardagamönnum er nánast aldrei refsað fyrir brot á reglunum.
Nú er stóra spurningin hver verður næsti andstæðingur Volkov. Francis Ngannou hefur verið nefndur til sögunnar en hann hefur ekkert barist síðan í janúar og átti auðvitað að mæta Junior dos Santos á UFC 215 áður en sá síðarnefndi féll á lyfjaprófi. Kannski vill UFC sleppa því að etja tveimur efnilegum þungavigtarmönnum gegn hvor öðrum og fer Volkov þá kannski í reyndari kappana. Cain Velasquez gæti verið stórt próf fyrir Volkov ef hann er tilbúinn til að snúa aftur fljótlega.
Það næst markverðasta á kvöldinu var sigur Mairbek Taisumov á Felipe Silva. Þetta var fimmti sigur Taisumov í röð eftir rothögg og er löngu kominn tími á að hann fái almennilegt próf. Viðtalið við hann eftir bardagann var líka kostulegt þar sem hann grátbað UFC um að gefa sér topp 10 andstæðing.
WOW!!!! @Taisumov155 gets a HUGE KO victory over silva in the first round at #UFCRotterdam!@JohnGoodenUK‘s timing isn’t so bad either! pic.twitter.com/1iWC6aPhTJ
— UFC Fight Pass (@UFCFightPass) September 2, 2017
Meiðsli og vandamál með vegabréfsáritun hafa aftur á móti haldið aftur af honum. Hann bíður alltaf upp á skemmtun í búrinu og á hann skilið að fá stærri nöfn. Fyrst og fremst þarf hann samt að halda sér heilum og koma vegabréfsmálunum sínum í lag til að fá þessa stóru bardaga.
Næsta UFC kvöld er á laugardaginn þegar UFC 215 fer fram en þar eru tveir titilbardagar á dagskrá. Demetrious Johnson mætir þá Ray Borg um fluguvigtartitilinn og Amanda Nunes og Valentina Shevchenko mætast um bantamvigtartitil kvenna.
