Robin Black og John Ramdeen skoðuðu á dögunum þá bardaga sem gætu flogið undir radarinn hjá bardagaaðdáendum. Einn af þeim bardögum er viðureign Gunnars Nelson gegn Dong Hyun Kim.
Gunnar Nelson mætir Dong Hyun Kim í aðalbardaganum á UFC bardagakvöldinu í Belfast þann 19. nóvember. Viku áður fer UFC 205 fram og er mikið talað um bardagana þar og eru því nokkrir bardaga sem eiga það til að gleymast.
Robin Black hefur mikið álit á Gunnari og telur að hann muni vinna Dong Hyun Kim verði hann upp á sitt besta. Dong Hyun Kim hefur aðeins tapað fyrir mönnum á borð við Tyron Woodley, Carlos Condit og Demian Maia (reyndar eftir vöðvakrampa). Það yrði því flott rós í hnappagatið hjá Gunnari fari hann með sigur af hólmi gegn Kóreumanninum.
Að mati Robin Black er þetta einn besti bardaginn sem er framundan og erum við ekki ósammála því.
