Stipe Miocic varði þungavigtartitil sinn á laugardaginn á UFC 203. Hann var ekki lengi að fagna enda var hann mættur á slökkviliðsstöðina í morgun.
Meðfram bardagaferlinum starfar Stipe Miocic sem slökkviliðsmaður og sjúkraflutningamaður. Hann vinnur mest á kvöldin og um helgar og er með góða yfirmenn sem hjálpa honum að púsla bardagaferlinum með aukavinnunni.
Miocic elskar að hjálpa fólki og er ekki tilbúinn að hætta sem slökkviliðsmaður þrátt fyrir að vera þungavigtarmeistari UFC. Þess má geta að Miocic fékk tæpar 70 milljónir íslenskra króna fyrir sigurinn á Overeem um helgina.
Margir bardagamenn kjósa að fara í frí og jafnvel slappa af á ströndinni eftir bardaga og langan undirbúning þar á undan en ekki Miocic. Í dag var hann mættur á slökkviliðsstöðina þar sem hann mætti á námskeið.
