Belgíski bardagamaðurinn Tarec Saffiedine getur mætt Rick Story um helgina. Saffiedine óttaðist að meiðsli myndu koma í veg fyrir bardagann en svo er ekki.
Á sunnudaginn sagði Saffiedine við MMA Fighting að hann myndi ekki geta barist á UFC bardagakvöldinu nú á sunnudaginn eins og til stóð. Fyrrum Strikeforce meistarinn sagði þetta á sunnudaginn:
„Að öllum líkindum mun ég ekki berjast um helgina. Ég er núna á leiðinni til Vegas til að hitta lækni UFC. Ef UFC getur ekki fundið staðgengil fyrir mig og læknirinn segir að ég sé í lagi gætum við kannski barist eftir tvær vikur. Ég mun vita meira um þetta á morgun [í dag] eftir að ég hitti lækninn.“
Saffiedine fékk skurð á hnéð þegar hann var að reyna að verjast fellu á síðustu æfingunni í æfingabúðunum. Saffiedine skar sig á búrinu og þurfti að sauma spor í hnéð en hnéð er talsvert bólgið.
Í The MMA Hour fyrr í dag kom hins vegar fram að Saffiedine hefur fengið grænt ljós frá lækni UFC og getur mætt Rick Story á sunnudaginn eftir allt saman.
There ya go! All’s well that ends well for Tarec and Rick. Beautiful stuff. https://t.co/UFcyZiohsi
— Ariel Helwani (@arielhelwani) May 23, 2016
Þetta verður fyrsti bardagi Rick Story síðan hann sigraði Gunnar Nelson í október 2014 en Story hefur glímt við mikil meiðsli.
Bardaginn fer fram á UFC Fight Night 88 á sunnudaginn en bardagakvöldið verður sýnt í beinni útsendingu á Stöð 2 Sport. Í aðalbardaga kvöldsins mætast þeir Thomas Almeida og Cody Garbrandt.
