UFC 204 mun fara fram í Manchester í október þar sem Michael Bisping mun verja beltið sitt í fyrsta sinn. Þá mætir hann Dan Henderson í aðalbardaga kvöldsins á sínum heimavelli.
Þetta herma heimildir MMA Fighting. Bæði Henderson og Bisping hafa samþykkt að mætast á UFC 204 en einungis er um að ræða munnlegt samkomulag enn sem komið er.
Bardagakvöldið mun taka mið af bandaríska sjónvarpsmarkaðnum og mun því aðalhluti bardagakvöldsins hefjast seint á staðartíma í Manchester. Bardagi Bisping og Henderson verður því kl 5 um morguninn í Englandi sem er ansi sérstakt.
Bardagakvöldið verður eflaust mjög stórt á evrópskan mælikvarða og vonumst við eftir að sjá Gunnar Nelson berjast þar. Bardagakvöldið fer fram þann 8. október í Manchester Arena en höllin tekur um 20.000 manns.
Gunnar hefur ekkert barist síðan hann vann Albert Tumenov í Rotterdam þann 8. maí. Gunnar er sem stendur í 11. sæti styrkleikalistans og verður gaman að sjá hvaða andstæðing hann fær næst.
