Allt bendir til að vandræðagemlingurinn Thiago Silva hafi fundið sér nýtt heimili hjá Fight Time Promotions og mun keppa sinn fyrsta bardaga á Fight Time 20 bardagakvöldinu hjá þeim þann 29. ágúst.
Silva var handtekinn fyrr á árinu fyrir meint afbrot gangvart fyrrum eiginkonu sinni, Thaysa Kamiji, og núverandi kærasta hennar, Pablo Popovitch. Á hann að hafa mætt fyrir utan MMA félag hennar hjá Pablo Popovitch í Fort Lauderdale með AK-47 í hönd og hótað að skjóta alla þar inni. Einnig fékk hann á sig aðra kæru fyrir að hafa beitt mótstöðu gegn handtökunni þó hann beitti lögreglunni ekki ofbeldi í mótstöðu sinni. Silva var hleypt úr varðhaldi gegn 25.000 dollara fangelsistryggingu. Nánar má lesa um afbrot Silva hér.
Innganga Silva í Fight Time samtökin kemur ekki upp úr þurru en Silva æfði hjá American Top Team þangað til 2012 og er félagið í eigu Howard Davis Jr. sem einnig á Fight Time samtökin. Silva á líklega aldrei eftir að fá inngöngu í eitt af stærri samtökunum eftir handtökuna þannig hann verður að láta sér þetta duga eins og er.
Það getur ekki talist eðlilegt að maður sem hótaði að skjóta saklaust fólk með AK-47 fyrir aðeins nokkrum mánuðum síðan geti barist aftur. Eins og fyrr segir eru bardagasamtökin í eigu vinar Thiago Silva og líklegast er þetta eini staðurinn sem myndi leyfa honum að berjast í dag. Howard Davis Jr. ætlar greinilega að vera vini sínum til halds og traust á erfiðum tímum í lífi Silva.
