Bryce Mitchell hefur verið mikið í umræðunni undanfarið fyrir allt annað en að berjast og eftir athugasemdir sem Mitchell lét falla í fyrsta þætti af nýja hlaðvarpsþætti sínum um Hitler og helförina hefur Dana White opinberlega gagnrýnt hann harkalega og kallað hann heimskann og fáfróðann. Það er nú búið að para Mitchell upp við einn hættulegasta mann á uppleið í fjaðurvigtinni, Jean Silva frá Fighting Nerds.
Bryce Mitchell og Jean Silva mætast á UFC 314 sem fer fram 12. apríl í Miami. Dana White tilkynnti um bardagann í lifandi streymi á samfélagsmiðlum um leið og hann tilkynnti um að Rafael Fiziev væri að koma inn fyrir Dan Hooker sem andstæðingur Justin Gaethje á UFC 313 eins og MMA Fréttir greindu nýverið frá.
Jean Silva kallaði Bryce Mitchell út eftir 1. lotu rothöggs sigur sinn á Melsik Baghdasaryan um síðustu helgi. Hjólin snúast hratt í þessum bransa því Mitchell hafði strax samband við UFC til að lýsa yfir sínum áhuga og bardaginn settur saman á mettíma.
Jean Silva er á 12 bardaga sigurgöngu og er búinn að vinna fyrstu 4 UFC bardaga sína síðan í janúar í fyrra. Silva fékk tækifæri í Dana White´s Contender Series í september 2023 eftir 7 sigra í röð sem hann kláraði alla í 1. lotu. Hann sigraði þar á einróma ákvörðun og fékk UFC samning. Það er augljóst að Jean Silva hefur eitthvað sérstakt og er á hraðri uppleið og sömu sögu má segja um alla æfingafélaga hans hjá Fighting Nerds.
Dana White hefur áður sagt í tengslum við Bryce Mitchell að það fallega við þennan bransa sé að þú getur fengið að sjá þann sem þú hatar laminn í sjónvarpi, sýnt á heimsvísu. Þar sem hann virðist vera búinn að fá sig fullsaddann af Bryce Mitchell kæmi það kannski ekkert rosalega á óvart að honum langi að sjá hann taka út ákveðna refsingu.
