UFC hefur sett á dagskrá blaðamannafund í New York í næstu viku þar sem þeir Conor McGregor og Khabib Nurmagomedov munu mæta. Blaðamannafundurinn fer fram á fimmtudaginn og má búast við áhugaverðum ummælum frá þeim báðum.
Bardaginn var tilkynntur í byrjun ágúst mánaðar og hefur UFC ekki enn haldið blaðamannafund með stjörnum kvöldsins. Fimmtudaginn 20. september mæta þeir báðir á blaðamannafund þar sem þeir munu í fyrsta sinn standa á móti hvor öðrum augliti til auglits. Þeir Khabib og Conor mætast svo í búrinu á UFC 229 þann 6. október í Las Vegas.
Þann 3. nóvember fer UFC 230 fram í Madison Square Garden í New York og á UFC enn eftir að tilkynna aðalbardaga kvöldsins þar. Miðasala á UFC 230 hefst í næstu viku og er talið að aðalbardaginn verði tilkynntur á blaðamannafundinum eða skömmu fyrir blaðamannafundinn.
Conor McGregor birti svo myndband í gær á Instagram þar sem hann fer ansi hart gegn æfingafélögum sínum og er greinilegt að það er ekkert gefið eftir hjá SBG í Dublin.
View this post on Instagram
