Undanúrslit Evrópumótsins í MMA fara fram í dag þar sem Ísland á tvo fulltrúa. Magnús Ingi Ingvarsson keppir í undanúrslitum í veltivigt og Egill Øydvin Hjördísarson keppir í undanúrslitum í léttþungavigt.
Magnús mætir Gianluigi Ventoruzzo frá Ítalíu en þetta verður fjórði bardagi Magnúsar á fjórum dögum. Ventoruzzo sat hjá í fyrstu umferð og er því aðeins búinn með tvo bardaga en ekki þrjá líkt og Magnús. Báðir bardagar Ítalans hafa farið allar þrjár loturnar á meðan Magnús hefur klárað alla þrjá bardaga sína. Ventoruzzo er 8-2 sem áhugamaður í MMA.
Andstæðingur Egils er Mjölnismönnum kunnugur. Sá heitir Tencho Karaenev og kemur frá Búlgaríu. Tencho vann Egil á Evrópumótinu í fyrra eftir hengingu í 1. lotu. Hann vann svo Bjarna Kristjánsson á Heimsmeistaramótinu í sumar eftir dómaraákvörðun og hefur því sigrað tvo Mjölnismenn.
Egill kvaðst vera spenntur fyrir því að mæta Búlgaranum aftur en þetta sagði hann eftir bardaga þeirra í fyrra. „Ég hef fulla trú á því að ef ég hitti aftur þennan mann eftir fullar æfingabúðir muni ég jarða hann.”
Tencho er margverðlaunaður á þessum Heims- og Evrópumeistaramótum IMMAF (International MMA Federation). Á HM í fyrra fékk hann silfur og svo brons á EM í fyrra þar sem hann þurfti að hætta keppni vegna bakmeiðsla. Á HM í sumar fékk hann svo annað silfur og er Tencho eflaust að elta gullið.
Á EM í ár hefur Tencho barist einn bardaga þar sem hann sat hjá í fyrstu umferð. Bardagann vann Tencho eftir dómaraákvörðun líkt og Egill gerði í sínum fyrsta bardaga.
