Santiago Ponzinibbio kannast ennþá ekkert við að hafa potað í augu Gunnars í bardaga þeirra í sumar. Í viðtali í gær kveðst hann vera heiðarlegur og spila alltaf eftir reglunum.
Santiago Ponzinibbio mætir Mike Perry á laugardaginn. Þetta verður fyrsti bardagi Argentínumannsins eftir sigurinn umdeilda á Gunnari Nelson í júlí.
Fjölmiðladagurinn fór fram í gær og þar kannaðist Ponzinibbio ekkert við að hafa potað í augu Gunnars.
„Gunnar sagði ekkert í bardaganum. Ég er heiðarlegur. Ef hann hefði sagt eitthvað hefði ég stoppað,“ sagði Ponzinibbio.
Ponzinibbio segist alltaf spila eftir reglunum og í 14 bardögum í UFC hafi hann aldrei gert neitt ólöglegt.
