Aðalbardagi kvöldsins á Bellator 215 í gær entist aðeins í 15 sekúndur. Matt Mitrione sparkaði þá í klof Sergei Kharitonov og gat sá síðarnefndi ekki haldið áfram.
Bellator er með tvö bardagakvöld þessa helgina en það fyrra fór fram í gær. Bardagakvöldið var fínasta skemmtun og mátti sjá flott tilþrif en aðalbardaginn olli töluverðum vonbrigðum.
Mitrione sparkaði þá í klof Kharitonov og gat Kharitonov ekki haldið áfram. Mitrione baðst strax afsökunar á þessu en bardaginn var í kjölfarið dæmdur ógildur (e. no contest). Kharitonov virtist vera sárþjáður en hann var fluttur upp á spítala.
Mitrione baðst aftur innilegrar afsökunar á blaðamannafundinum og vonast eftir að fá annan bardaga sem fyrst.
