Cage Warriors samtökin, sem af mörgum eru talin stærstu MMA samtök Evrópu, munu hefja sókn sína inn á norræna markaðinn á næsta ári. Fyrir liggur að halda þrjá viðburði og er áætlað að sá fyrsti verði haldinn í Kaupmannahöfn en að Svíþjóð verði næst á dagskrá síðar á árinu. Einnig hafa forráðamenn samtakanna lýst yfir áhuga á að halda viðburð í Noregi, en þar er keppni í MMA bönnuð enn sem komið er.
Nokkrir norrænir bardagakappar eru á mála hjá samtökunum og fyrir skömmu fengu þeir til liðs við sig hinn danska Nicolas Dalby, sem er ósigraður og keppir í veltivigtinni. Líklegt verður að teljast að hann komi til með að þreyta frumraun sína í Cage Warriors á viðburðinum í Kaupmannahöfn á næsta ári. Meðal frægra bardagakappa sem barist hafa í samtökunum má nefna Michael Bisping, Dan Hardy, hinn efnilega Cathal Pendred og Íslandsvininn Conor McGregor, sem var bæði fjaðurvigar- og léttvigtarmeistari í samtökunum. Það er því ljóst að það eru spennandi tímar framundan í Evrópsku MMA senunni.
