Isaac ‘The Sherminator’ Marquez er mikill MMA aðdáandi. Isaac fékk að upplifa gamlan draum á dögunum þegar hann barðist sinn fyrsta MMA bardaga gegn goðsögninni Diego Sanchez.
Hinn 32 ára Isaac Marquez er með Downs-heilkenni og býr í Albuquerque í Bandaríkjunum. Jackson-Wink bardagaklúbburinn er staðsettur í borginni þar sem bardagamenn á borð við Diego Sanchez, Jon Jones og Holly Holm æfa.
Isaac kíkti á klúbbinn fyrr á árinu þar sem hann hitti Diego Sanchez. Sanchez bauð honum að koma og æfa með sér en Sanchez er með 40 bardaga að baki en 27 þeirra hafa farið fram í UFC.
Eftir nokkra mánuði af æfingum var hann tilbúinn í bardaga og mætti sjálfum Diego Sanchez um síðustu helgi. Isaac barðist fyrir mömmu sína sem er fallin frá. Isaac sigraði Sanchez með armlás í 1. lotu og misstu áhorfendur sig úr fögnuði.
