Þetta er í annað sinn á tveimur árum sem Jones er sviptur titli í UFC. Í maí 2015 var Jones sviptur léttþungavigtartitlinum sínum eftir að hafa valdið þriggja bíla árekstri og flúið af vettvangi.
Hann snéri svo aftur í búrið í apríl á þessu ári en upphaflega átti hann að mæta meistaranum Daniel Cormier. Cormier meiddist hins vegar þremur vikum fyrir bardagann og mætti Jones þess í stað Ovince St. Preux um svo kallaðan bráðabirgðartitil. Jones sigraði eftir dómaraákvörðun en beltin voru aldrei sameinuð.
Jon Jones féll á lyfjaprófi í aðdraganda bardaga hans gegn Daniel Cormier á UFC 200 og var bardaginn sleginn af borðinu. Gerðardómur USADA komst fyrr í vikunni að þeirri niðurstöðu að ólöglegu efnin sem fundust í lyfjaprófi Jon Jones reyndust hafa komið úr stinningarlyfi. Hann fékk því eins árs bann frá USADA og hefur nú verið sviptur titlinum.
Jon Jones er sá fyrsti í sögu UFC til að vera sviptur alvöru titli og bráðabirgðartitli.
„Hann var bráðabirgðarmeistarinn þar sem hann átti að berjast um titilinn í apríl. Við gáfum honum þetta belti,“ sagði Dana White við 5ive Rounds hlaðvarpið.
„Eftir allt það sem búið er að gerast er út í hött að hann sé ennþá bráðabirgðarmeistarinn. Jon Jones hefur klúðrað svo ótrúlega miklu. Sá hæfileikaríkasti og sá sem hefur klúðrað mestu frá upphafi.“
Heimild: ESPN
