Max Holloway getur ekki barist á laugardaginn vegna heilahristings sem hann varð fyrir á dögunum. Bisping grunaði að eitthvað væri að þegar hann ræddi við hann í UFC Tonight í gær skömmu áður en Holloway dró sig úr bardaganum.
Max Holloway átti að mæta Brian Ortega á UFC 226 á laugardaginn um fjaðurvigtartitilinn. Óvíst er hvort Ortega fái annan andstæðing í stað Holloway á þessari stundu en Holloway upplifði einkenni heilahristings.
Holloway leit ekki út eins og hann sjálfur í viðtölum í vikunni og í Embedded þáttunum. Margir töldu að niðurskurðurinn væri að hrjá Holloway líkt og Bisping taldi í viðtalinu hér að neðan. Holloway sýndi einkenni heilahristings á dögunum og var sendur á sjúkrahús á mánudaginn í frekari skoðun en leið betur daginn eftir. Holloway neitaði að hætta við bardagann en þegar ástand hans versnaði í gær, miðvikudag, var sú ákvörðun tekin að Holloway myndi ekki berjast á laugardaginn.
