Dana White segir að Nate Diaz og Jorge Masvidal munu mætast á UFC 244 í nóvember. Bardaginn verður aðalbardaginn á bardagakvöldinu í Madison Square Garden.
Dana White greindi frá þessu í viðtali við ESPN fyrr í dag en síðan þá hafa fleiri miðlar staðfest bardagann. Enginn alvöru titill verður í boði þrátt fyrir að þetta verði aðalbardaginn á númeruðu bardagakvöldi.
Nate Diaz sigraði Anthony Pettis í ágúst og sagðist vilja berjast við Jorge Masvidal um „The baddest motherfucker in the game“ beltið. Nú segist Dana White ætla að búa til sérstakt BMF belti fyrir þá sem verður í húfi í bardaganum.
Vonir stóðu til að Colby Covington og Kamaru Usman myndu berjast á kvöldinu en svo virðist sem samningaviðræður hafi siglt í strand.
Bardaginn fer fram í veltivigt á UFC 244 þann 2. nóvember í Madison Square Garden.
