Quillan Salkilld steig upp á stærsta svið ferilsins á UFC Vegas 120 þegar hann mætti pólska glímunautnum Matheaus Gamrot. Ástralinn kafsigraði reynsluboltann í aðalbardaga kvöldsins og sýndi frammistöðu sem hefur breytt umræðunni um hann úr því að vera efnilegur nýliði yfir í mögulegan framtíðarmeistara í léttvigt UFC.
Salkilld, sem er aðeins 26 ára gamall, hafði þegar sýnt mikla hæfileika í fyrstu bardögum sínum í UFC. Hann kom þó inn í bardagann gegn Gamrot frammi fyrir erfiðasta prófi ferilsins. Pólverjinn hefur um árabil verið einn hættulegasti glímumaður deildarinnar og er sérstaklega þekktur fyrir að draga andstæðinga inn í hraðar og erfiðar glímuskiptingar þar sem hann fær að stjórna bardaganum á sínum forsendum.
Það var einmitt þess vegna sem margir töldu Gamrot vera sérstaklega erfiðan andstæðing fyrir Salkilld. Ástralinn er fjölhæfur bardagamaður sem blandar saman höggum og glímu, en gegn sérfræðingi á borð við Gamrot hefði það getað reynst honum hættulegt að fara of mikið í glímuna. Í staðinn sýndi Salkilld að hann gat barist á öllum sviðum og jafnframt stjórnað því hvar bardaginn fór fram.
Strax frá upphafi náði Salkilld að hitta Gamrot með nákvæmum spörkum og höggum. Hann notaði jabbinn vel og vann markvisst að líkama Pólverjans áður en hann fann stóra opnun með vinstri krók. Höggið skók Gamrot og neyddi hann til að leita í glímuna til að komast undan pressunni.
Það sem gerðist næst var sérstaklega athyglisvert. Gamrot, sem hefur byggt stóran hluta ferils síns á því að vinna glímuskiptingar, átti óvenju erfitt með að halda Salkilld niðri. Í einni tilrauninni endaði hann meira að segja í því að draga sig niður í guard og reyna að vinna fótalás, sem er afar óvenjulegt fyrir bardagamann sem hefur svo sterka glímu og svo mikla reynslu af fimm lotna bardögum.
Salkilld hélt áfram að vera skrefi á undan. Þegar Gamrot reyndi aftur að snúa stöðunni sér í hag náði Ástralinn að fylgja hreyfingum hans og halda stjórninni. Hann náði síðan doubleleg við búrið, fékk bakið á Gamrot og hélt honum þar þrátt fyrir ítrekaðar tilraunir Pólverjans til að losa sig.
Gamrot reyndi hvað eftir annað að snúa sér yfir í yfirburðastöðu en Salkilld las hreyfingarnar vel og náði aftur stjórn á bakinu. Eftir allar þessar glímuskiptingar var Gamrot orðinn þreyttur og berskjaldaður. Salkilld nýtti sér það, læsti rear-naked choke og neyddi Gamrot til að gefast upp. Bardaganum lauk í fyrstu lotu.
Það sem gerir sigurinn sérstaklega merkilegan er ekki aðeins að Salkilld hafi unnið Gamrot heldur hvernig hann gerði það. Hann sigraði reynslumikinn toppbardagamann á öllum sviðum og virtist aldrei vera undir mikilli pressu. Hann stjórnaði fjarlægðinni í standandi bardaga, varði glímuna þegar þurfti og vann síðan sjálfur stöðuna á gólfinu.
Salkilld er nú 6-0 í UFC og hefur með þessum sigri stigið inn í umræðuna um bestu bardagamenn léttvigtarinnar. Hann er enn tiltölulega reynslulítill miðað við mörg af stærstu nöfnum deildarinnar, en frammistaðan gegn Gamrot sýndi að hann virðist ekki þurfa mörg ár til viðbótar til að vera tilbúinn í allra sterkustu andstæðingana.
Nú verður áhugavert að sjá hvernig UFC bregst við. Eftir svona stóran sigur er erfitt að réttlæta enn eitt verkefni gegn bardagamanni utan toppbaráttunnar. Salkilld ætti að fá næsta próf gegn einhverjum af fremstu mönnum deildarinnar og þar gæti hann fengið tækifæri til að sanna að sigurinn á Gamrot hafi ekki verið einstakt kvöld heldur upphafið að alvöru titilhlaupi.
