Í dag fór fram síðasti keppnisdagurinn á Evrópuemeistaramótinu í brasilísku jiu-jitsu í Lissabon. Í dag var keppt í brúnbeltingaflokki þar sem þrír Íslendingar voru skráðir til leiks.
Axel Kristinsson úr Mjölni keppti í -64 kg flokki brúnbeltinga. Axel vann fyrstu tvær glímur sínar á uppgjafartaki og var þar með kominn í undanúrslit. Í undanúrslitunum tapaði hann naumlega á stigum og nældi sér þar með í brons. Virkilega vel gert hjá Axel.
Þráinn Kolbeinsson, einnig úr Mjölni, keppti í -94,3 kg flokki brúnbeltinga. Eftir að hafa unnið fyrstu glímuna sína á hengingu var hann kominn í undanúrslit. Þar tapaði hann á naumlega á stigum líkt og Axel og fékk einnig brons. Ingþór Örn Valdimarsson úr Fenri keppti í sama flokki og Þráinn en hann tapaði sinni fyrstu glímu og komst ekki áfram.
Þar með hafa 22 Íslendingar lokið sér af á stærsta BJJ móti sögunnar. Uppskeran er ekki af verri endanum en íslensku keppendurnir hlutu tíu verðlaun, þar af fimm Evróputitla.
