Þrátt fyrir að bardagi McGregor og Aldo hafi aðeins staðið yfir í 13 sekúndur var talið að McGregor hafi meiðst á úlnlið í bardaganum. Nú hefur John Kavanagh, yfirþjálfari hans, sagt að McGregor sé í góðu lagi.
Eftir hvert bardagakvöld í Nevada sendir íþróttasamband fylkisins frá sér lista yfir meiðsli bardagamanna og hve lengi þeir þurfa að vera frá. Á listanum kom fram að McGregor gæti þurft að vera frá í allt að sex mánuði vegna meiðsla á vinstri úlnlið. Þar kom fram að McGregor þurfi frekari röntgenskoðun til að greina meiðslin.
John Kavanagh skrifaði á opinberri Facebook síðu sinni að úlnliður hans sé 100% í lagi. McGregor gæti því auðveldlega barist í apríl/maí eins og hann talaði um eftir bardagann.
