Fluguvigtarmeistari kvenna, Valentina Shevchenko, mætir Katlyn Chookagian í febrúar. Þetta verður þriðja titilvörn hennar í UFC.
Valentina Shevchenko vann fluguvigtartitil kvenna í UFC með sigri á Joanna Jedrzejczyk í desember í fyrra en titillinn var laus eftir að Nicco Montano hafði verið svipt titlinum. Valentina fór síðan létt með Jessica Eye í júní og sigraði Liz Carmouche í ágúst í fremur leiðinlegum bardaga.
Katlyn Chookagian (13-2) hefur unnið tvo bardaga í röð og fjóra af fimm bardögum sínum í fluguvigt UFC. Chookagian hefur aldrei klárað bardaga í UFC en af 13 sigrum hennar á ferlinum eru 10 eftir dómaraákvörðun.
Bardaginn fer fram þann 8. febrúar í Houston á UFC 247. Jon Jones mætir Dominick Reyes í aðalbardaga kvöldsins.
