Björn með sigur eftir 50 sekúndur!

Björn Þorleifur Þorleifsson sigraði sinn fyrsta MMA bardaga á Evrópumótinu með tæknilegu rothöggi eftir aðeins 50 sekúndur. Þetta var fyrsti bardagi Björns í MMA.

Björn keppir í millivigt og mætti Premysl Kucerka frá Tékklandi fyrr í dag. Björn var ekki lengi að þessu og sigraði eftir aðeins 50 sekúndur með tæknilegu rothöggi.

Björn náði hásparki sem tryggði honum rothöggið. Þar áður hafði hann sparkað andstæðingnum nánast þvert yfir búrið með snúningssparki í magann og fellt hann með sparki í innanvert lærið.

Björn hefur margra ára reynslu úr Taekwondo og mætir Rostem Akman frá Svíþjóð í 8-manna úrslitum á morgun.