Gunnar Nelson hélt til Dublin í morgun en þar mun undirbúningur hans fyrir bardagann gegn Demian Maia fara fram næsta mánuðinn. Gunnar mun svo fara til Las Vegas í nóvember þar sem lokaundirbúningurinn fer fram.
Í Dublin mun hann æfa með Conor McGregor og félögum í SBG liðinu undir handleiðslu John Kavanagh. Conor McGregor berst í aðalbardaga kvöldsins á UFC 194 gegn Jose Aldo sama kvöld og Gunnar mætir Maia. Það hentar því vel fyrir þá Gunnar og McGregor að æfa saman fyrir bardagana 12. desember.
Í nóvember mun Gunnar ferðast til Las Vegas ásamt meðlimum SBG liðsins þar sem lokaundirbúningurinn fyrir UFC 194 fer fram. Síðast þegar kapparnir dvöldu í Vegas leigði McGregor glæsilega villu sem kallaðist MacMansion. Það verður því forvitnilegt að sjá hvort að glæsibragurinn verði sá sami í nóvember.
