Conor McGregor kom öllum á óvart í gær þegar hann steig aftur inn í hnefaleikahringinn í óvæntum æfingabardaga í Crumlin Boxing Club í Dublin, sama stað og hann hóf feril sinn á sínum tíma. Bardaginn var hluti af litlum “Good Friday” viðburði og mætti McGregor þar írskum hnefaleikamanni, Barry Nolan, í þriggja lotna exhibition bardaga.
Þrátt fyrir að um æfingabardaga væri að ræða lét McGregor finna vel fyrir sér. Hann var með hlífðarbúnað en náði samt tveimur talningum yfir andstæðing sinn, í annarri og þriðju lotu, eftir hnitmiðuð högg sem vöktu mikil viðbrögð í salnum. Myndbönd frá bardaganum sýna McGregor í góðu standi, beittan á höndum og sjálfsöruggan, þar sem hann sýndi sannfærandi frammistöðu fyrir áhorfendur með sínum einkennandi stíl.
Enginn sigurvegari var krýndur þar sem um exhibition bardaga var að ræða, en frammistaðan hefur engu að síður ýtt undir enn frekari umræðu um endurkomu hans í hinu átthyrnda búri UFC. McGregor hefur sjálfur talað um að hann stefni á að snúa aftur síðar á árinu og hefur 11. júlí, á alþjóðlegu bardagavikunni í Las Vegas, verið nefnd sem líkleg dagsetning í þeim efnum – þó ekkert hafi verið staðfest.
Með því að berjast í Crumlin, fyrir framan heimafólk sitt og á sama stað og hann steig sín fyrstu skref í hnefaleikum, virðist McGregor vera að senda ákveðin skilaboð. Hann er kominn aftur að grunninum, og kannski nær því en margir halda að snúa aftur á stærsta svið íþróttarinnar.
Þessi óvænti bardagi gæti því reynst vera fyrsta skrefið í átt að einni stærstu endurkomu í sögu bardagaíþrótta.
