Á laugardagskvöldið fór fram UFC Fight Night: Garcia vs Onama í Las Vegas þar sem Steve “Mean Machine” Garcia mætti David “Silent Assassin” Onama í aðalbardaga kvöldsins í fjaðurvigtinni. Bardaginn endaði með sannfærandi sigri Garcia sem stöðvaði Onama með tæknilegu rothöggi í fyrstu lotu.
Garcia kom ákveðinn til leiks og tók strax völdin. Hann þrýsti á Onama frá fyrstu sekúndu, hélt stöðugum hraða og beitti fjölbreyttum höggum sem neyddu Onama í stöðuga vörn. Eftir rúmar þrjár mínútur af látlausum árásum náði Garcia að loka bardaganum með miklum tilþrifum þegar dómarinn stöðvaði átökin eftir að Onama var hættur að verja sig.
Þetta var sjöundi sigur Garcia í röð og sá fjórði með rothöggi í fyrstu lotu. Hann sýndi mikla árásargirni, eiginleika sem gæti hjálpað til við að finna handa honum spennandi bardaga á stórum viðburð. Onama, sem hafði unnið sex af síðustu sjö bardögum sínum fyrir þetta kvöld, átti einfaldlega ekkert svar við pressunni og var kláraður í fyrsta sinn á ferlinum.
Garcia staðfesti með þessum sigri að hann er alvöru ógn í fjaðurvigtinni og tilbúinn fyrir stærri nöfn. Næstu skref gætu verið viðureign gegn einhverjum úr efri hluta styrkleikalistans og miðað við frammistöðuna í Vegas virðist hann vera tilbúinn í það verkefni. Garcia kallaði sjálfur út Max Holloway fyrir BMF beltið.
