UFC er með bardagakvöld annað kvöld á bardageyjunni þar sem þeir Brian Ortega og Chan Sung Jung mætast í aðalbardaga kvöldsins. Allir náðu vigt fyrir bardagana á morgun.
Það var ekkert vesen í vigtuninni fyrir bardaga morgundagsins. Það sem vakti helst athygli í vigtuninni var útlit Brian Ortega en hann mætti snoðaður í vigtuninni eftir að hafa rakað af sér síða hárið.
Ortega var 146 pund og voru strax getgátur um að hann hefði snoðað sig til að losa sig við síðustu grömmin fyrir vigtunina.
Að sögn Ortega var hann í engum vandræðum með niðurskurðinn og var löngu búinn að ákveða að snoða sig til að gefa hárið til góðgerðarmála. Hárið verður notað til að framleiða hárkollur fyrir börn sem misst hafa hárið eftir krabbameinsmeðferð.
