Þetta tilkynnti Lorenzo Fertitta, einn af eigendum UFC, í dag við undirritun lagafrumvarpsins. Andrew Cuomo, ríkisstjóri New York, samþykkti lagafrumvarpið í Madison Square Garden í dag. Lagafrumvarpið hafði áður verið samþykkt af þingi New York fylkis þann 22. mars.
UFC stjörnurnar Chris Weidman og Ronda Rousey voru viðstödd viðburðinn í dag en Lorenzo Fertitta nýtti tækifærið og tilkynnti fyrsta UFC viðburðinn sem haldinn verður í New York.
UFC 205 fer fram í Madison Square Garden og verður fyrsti viðburður UFC í ríkinu í 21 ár. Eini UFC viðburðurinn sem haldinn hefur verið í New York ríki hingað til er UFC 7 sem fór fram í Buffalo. UFC 205 fer fram þann 12. nóvember en fyrsta bardagakvöld UFC fór einmitt fram þann 12. nóvember 1993. Bardagakvöldið í New York mun því marka 23 ára afmæli UFC.
Enginn bardagi hefur verið staðfestur á UFC 205 enda enn langt í viðburðinn. Það má þó búast við því að bardagakvöldið verði stjörnum prítt enda fjölmargir UFC bardagamenn sem koma frá New York.
Sjá einnig: Meira um lögleiðingu MMA í New York
