Íslenska landsliðið í hnefaleikum hélt til Noregs á Norðurlandamótið um helgina með 4 boxara. Erika Nótt Einarsdóttir og Nóel Freyr Ragnarsson sem unnu gull og silfur í fyrra í u19 ára flokki voru að keppa í fyrsta skipti í fullorðinsflokki (elite) og Björn Jónatan Björnsson og Ronald Bjarki Mánason kepptu í fyrsta skipti á Norðurlandamótinu í u19 ára flokki. Íslendingarnir fjórir lentu öll á móti sterkum og reyndum andstæðingum og þó enginn hafi sigrað bardaga fengu þau öll dýrmæta keppnisreynslu á hæsta stigi.
Fyrstur inn fyrir Ísland var Nóel Freyr Ragnarsson gegn Kouc Mayuom frá Danmörku í -70kg flokki en Nóel var að keppa sinn fyrsta bardaga í landsliði í fullorðinsflokki (elite). Eftir sterka byrjun fyrstu tvær loturnar náði Daninn að enda loturnar vel, náði síðustu lotunni alveg á sitt band og sigraði Daninn á einróma dómaraákvörðun en Nóel sýndi vel að hann á fullt erindi á þessu sviði og hefur tekið virkilega flottum framförum undanfarið. Daninn endaði síðan á að vinna gullverðlaunin í flokknum.
Á degi tvö var fyrstur inn fyrir Ísland Björn Jónatan Björnsson gegn Eliar Kolomoichenko frá Finnlandi í U19 -65kg flokki en þetta var fyrsta landsliðsverkefni hjá Birni Jónatani. Bardaginn byrjaði vel og mikið að gerast hjá báðum aðilum, Björn Jónatan lenti þungum höggum og fékk á sig þung högg. Reynslumunurinn sýndi sig þegar fór að líða á en Björn Jónatan átti frábæra spretti yfir bardagann og klárt að það verður spennandi að sjá hann í næstu verkefnum. Finninn vann svo flokkinn á endanum og var valinn besti Youth boxarinn í karlaflokki á mótinu en hann er virkilega hátt skrifaður á heimsvísu og getur Björn Jónatan verið stoltur.
Næstur inn var síðan Ronald Bjarki Mánason en hann var einnig í fyrsta verkefni með landsliði, hann keppti við Rida Al-Tamimi í U19 -50kg flokki og fékk virklega verðugt verkefni en Daninn situr í 5. sæti á heimslista í þeirra aldursflokki. Bardaginn fór vel af stað fyrir Ronald og fyrsta lotan frekar jöfn heilt yfir en jafnt og þétt færðist bardaginn yfir til Rida sem vann Ronald á einróma dómaraákvörðun. Mjög flott frammistaða þrátt fyrir mikinn reynslumun og getum við verið stolt af okkar manni.
Síðasti keppandi fyrir Ísland á þessu Norðurlandamóti var síðan Erika Nótt Einarsdóttir gegn Anabelle Bruun frá Noregi í úrslitum í -51kg flokki en Erika var einnig að þreyta sína frumraun í Elite flokki með landsliði en Erika vann eftirminnilega fyrsta gull í sögu Íslands á mótinu í fyrra í flokki U19 og var tilbúin eftir langa æfingaferð erlendis að prufa sig áfram í Elite flokki. Bardaginn byrjaði vel og fyrsta lota fram og til baka en Anabelle gerði vel í að breyta taktík til að svara Eriku og komst í góða forystu í annarri lotu og vann síðan þriðju lotu sannfærandi. Niðurstaðan einróma sigur til Anabelle Bruun en hún var einnig valin besti kvennboxari mótsins að móti loknu og augljóst að andstæðingur Eriku var alvöru frumraun.
Þetta var yngsta lið sem hefur farið fyrir Ísland í nokkurt landsliðsverkefni en elstu keppendur í hópnum eru nýorðin 18 ára. Framtíðin er björt og greinilegt að það er sterkur hópur framtíðarboxara í okkar röðum.
