Dana White staðfesti í gærkvöldi að Henry Cejudo væri hættur. Hann sagði einnig að Petr Yan og Jose Aldo berjist um lausan titilinn í bantamvigtinni.
Dana White var í Sports Center í gær þar sem hann fór yfir stöðuna í bantamvigtinni. Beltið er nú laust og greindi Dana frá því að Jose Aldo fái titilbardaga gegn Petr Yan.
Aldo er aðeins með einn bardaga í bantamvigtinni en hann tapaði fyrir Marlon Moraes í desember í jöfnum bardaga. Þrátt fyrir tapið fékk hann titilbardaga gegn Cejudo og átti að berjast í maí. Aldo gat hins vegar ekki ferðast frá Brasilíu vegna kórónaveirunnar og kom Dominick Cruz í hans stað.
Talið er líklegt að bardaginn verði á UFC 251 þann 11. júlí í Las Vegas. Nú er spurning hvort Aldo geti ferðast til Bandaríkjanna í þetta sinn. Petr Yan er sjálfur í Tælandi og spurning hvort hann fái að ferðast til Bandaríkjanna.
Marlon Moraes átti að mæta Petr Yan í júní áður en bardagakvöldið var fellt niður vegna kórónaveirunnar. Hann situr eftir með sárt ennið þrátt fyrir að hafa fengið sigurinn gegn Jose Aldo.
