Fabricio Werdum er sagður hafa fallið á lyfjaprófi sem tekið var af USADA. Werdum þvertekur fyrir að hafa tekið inn einhver ólögleg efni.
Það var bara í gær sem bardagi Werdum og Alexey Oleynik var staðfestur sem aðalbardaginn á UFC bardagakvöldinu í Rússlandi í september. Nú er Werdum sagður hafa fallið á lyfjaprófi sem tekið var þann 25. apríl og er því óvissa hvort bardaginn fari fram á þessari stundu. Þetta kemur fram í tilkynningu sem UFC sendi frá sér í dag.
Umboðsmaður Werdum, Ali Abdel-Aziz, sendi frá sér tilkynningu í dag þar sem hann lýsti yfir undrun sinni á niðurstöðum lyfjaprófsins. „Ég og starfsfólk UFC erum að reyna að leysa þetta vandamál í sameiningu. Ég hef fulla trú á að þetta leysist allt, þetta er bara misskilningur. Það er eitthvað ekki í lagi, Fabricio tók ekkert ólöglegt,“ segir í tilkynningunni.
Ekki er vitað hvaða efni fundust í lyfjaprófinu og á enn eftir að dæma í málinu. Nokkur fjöldi bardagamanna hafa verið að falla á lyfjaprófum USADA en náð að sýna fram á sakleysi sitt og þar af leiðandi fengið styttra bann. Má þar nefna menn á borð við Junior dos Santos og Guido Cannetti sem sýndu fram á að ólöglegu efnin í þeirra lyfjaprófum komu úr fæðubótarefnum.
