Framtíð Global Fight League er óljós eftir að samtökin aflýstu fyrstu tveimur viðburðum sínum sem áttu að fara fram 24. og 25. maí í Los Angeles.
Andy Foster, framkvæmdastjóri íþróttamálanefndar Kaliforníu, staðfesti að báðum viðburðunum sem áttu að fara fram í Shrine Auditorium í Los Angeles hafi verið aflýst. Fleiri heimildarmenn í tengslum við bardagamenn sem stóð til að myndu berjast á þessum dagsetningum staðfestu einnig fréttirnar við ýmsa fjölmiðla eftir að Fight Oracle birtu fyrstir fréttirnar á Twitter.
Þegar GFL var fyrst tilkynnt, voru snemma viðræður um viðburð í apríl sem síðar færðust til maí. Nú, þegar þessum viðburðum hefur verið aflýst, á eftir að koma í ljós hvort GFL ævintýrinu ljúki áður en það byrjar. Þó að enn séu viðræður í gangi um að endurskipuleggja viðburðina seinna á árinu, er ekki vitað hvort bardagamennirnir sem hafa skrifað undir hjá GFL ætla að halda áfram eftir þetta klúður.
Viðburðarnir tveir, sem núna hafa verið aflýstir, innihéldu nöfn eins og Tony Ferguson, Dillon Danis, Chad Mendes, Anthony Pettis, Benson Henderson, Holly Holm, Urijah Faber, Alexander Gustafsson, Paige VanZant og Cat Zingano.
Margir bardagamenn sem skrifuðu undir hjá GFL töluðu um ótrúlega rausnarleg fjárhagsleg kjör sem boðið var upp á, sem vakti strax efasemdir um langtíma hagkvæmni samtakanna.
