Aaron Pico hefur skrifað undir samning við UFC og er strax komin mikil eftirvænting eftir frumraun hans meðal þeirra sem þekkja til en fyrir þá sem fylgjast ekki með öðrum bardagasamtökum en UFC hafa mögulega aldrei heyrt minnst á hann áður.
Hinn 28 ára gamli fjaðurvigtar bardagamaður, Aaron Pico, hefur skrifað undir samning við UFC. Frá þessu greindi umboðsmaður hans, Ali Abdelaziz, við ESPN á þriðjudaginn. Ali er vel þekktur umboðsmaður en meðal skjólstæðinga hans má nefna Khabib Nurmagomedov, Khamzat Chimaev, Kamaru Usman, Justin Gaethje og lengi mætti áfram telja. UFC hefur ekki gefið út hvenær hann mun þreyta frumraun sína en Pico sagði sjálfur að hann væri í æfingabúðum og vonast til að berjast eins fljótt og auðið er.
Aaron Pico er 13-4 sem atvinnumaður í MMA og hafði einungis barist fyrir Bellator þangað til Bellator og PFL var sameinað. Eftir samrunann barðist Pico við Henry Corrales á prelims korti “PFL vs. Bellator: Champs” viðburðinum þar sem hann sigraði með rothöggi í fyrstu lotu. Corrales hafði áður sigrað Pico árið 2019 á Bellator 214, sá bardagi kláraðist einnig með rothöggi í fyrstu lotu.
Pico er ekki mikið fyrir það að láta dómarana um það að skera úr um sigurvegara og hefur hann aðeins tvisvar sinnum á ferlinum farið alla leið í dómaraúrskurð en hann sigraði báða þá bardaga með einróma ákvörðun. Oftar en ekki enda bardagar hans með rothöggi og ekki ósjaldan kemur rothöggið snemma en hann á einnig nokkra sigra eftir uppgjafartök á ferilskránni.
Það verður áhugavert að sjá hver fær það krefjandi verkefni að bjóða Pico velkominn í UFC. Vonandi heldur hann uppteknum hætti og gefur UFC áhorfendum jafn mikla skemmtun og hann er þekktur fyrir innan Bellator en gagnrýnisraddir hafa þegar heyrst sem segja hann verða afhjúpaðan þegar komið verður á stærsta sviðið sem UFC óneitanlega er.
