Meiðsli og nýjir bardagar er það sem kemur fram í UFC molunum.
B.J. Penn mætir Ricardo Lamas
Svo virðist sem næsti bardagi B.J. Penn sé nánast staðfestur. Penn mun mæta Ricardo Lamas í aðalbardaganum á bardagakvöldi í Filippseyjum í október. Þetta verður annar bardagi Penn í fjaðurvigt en Penn átti að mæta Cole Miller fyrr á árinu en bardaginn var felldur niður. Penn braut reglur USADA eftir að hann fékk næringu í æð en slíkt er stanglega bannað af USADA.
UFC Portland fær geggjaða bardaga
UFC heimsækir Portland þann 1. október og munu þeir John Dodson og John Lineker berjast í aðalbardaga kvöldsins. Báðir eru þekktir fyrir að láta allt vaða og ætti þetta að vera virkilega skemmtilegur bardagi. Bardagakvöldið lítur ansi vel út eins og staðan er núna en þetta kvöld berst Will Brooks við Alex Oliveira og Sergio Pettis mætir Louis Smolka svo fátt eitt sé nefnt.
Ben Rothwell meiðist
Ben Rothwell átti að mæta Fabricio Werdum á UFC 203 í september. Rothwell hefur nú þurft að draga sig úr bardaganum vegna meiðsla og kemur Travis Browne í hans stað. UFC 203 fer fram þann 10. september þar sem Stipe Miocic mun freista þess að verja titilinn sinn gegn Alistair Overeem.
