UFC hefur samið við Danann Mads Burnell (8-1) en hann þykir einn af efnilegri keppendum Norðurlandanna. Burnell setur markið hátt en hann ætlar að verða einn besti bardagamaður sögunnar.
Þetta kemur fram á vef MMA Viking en Burnell er ekki kominn með andstæðing eins og er. Líklega mun hann berjast á UFC kvöldinu í Póllandi í október en Burnell berst í léttvigt.
Hinn 23 ára gamli Burnell æfir í Arte Suave í Kaupmannahöfn og er með svart belti í brasilísku Jiu-Jitsu. Hann fékk svarta beltið sitt frá Chris Haueter aðeins þremur árum eftir að hann byrjaði að æfa BJJ. Það afrek setur hann í mjög fámennan hóp manna á borð við B.J. Penn og Caio Terra sem hafa fengið svarta beltið sitt á undir þremur árum. Hann vann Evrópumótið í Nogi árið 2014 og er sannkallað undrabarn í gólfglímunni. Burnell er einnig búinn með einn atvinnubardaga í boxi sem hann sigraði.
Burnell tók upp skemmtilega seríu af myndböndum titluð The Submachine sem sýnir frá æfingum hans í Kaliforníu. Fyrsta þáttinn í seríunni má sjá hér að neðan:
