Það stefnir allt í að september verði rosalegur bardagamánuður hjá okkur Íslendingum. Kolbeinn Kristinsson mun berjast í Finnlandi 3. sept, strákarnir í Reykjavík MMA mæta til Doncaster 7. sept og svo hefur núna verið staðfest að Valgerður Guðsteinsdóttir mun berjast í Írlandi 20. september.
Valgerður mun mæta heimakonunni Shauna O’Keeffe (2 – 0) í 3 Arena leikvanginum í Dublin. Bardagakvöldinu mun vera streymt beint á UFC Fight Pass. Dana White tilkynnti á Instagram um aðalbardaga kvöldsins, sjá hér:
Valgerður átti hrikalega flotta frammistöðu gegn Jordan Dobie í Kanada í maí fyrr á árinu. Valgerður tapaði þá á klofinni dómaraákvörðun en menn voru alls ekki sammála dómurunum og vildu sumir meina að Valgerður hefði verið rænd sigrinum.
Það má búast við að Valgerður mæti hungruð til leiks og ætli sér að sækja sigurinn. Hún er með sterkt lið á bak við sig og hefur sjálf lagt allt í sölurnar til að ná eins langt og hún getur í hnefaleikum.
Að öllum líkindum mun Valgerður þurfa að eiga aðra eins frammistöðu og hún átti í Kanada og gott betur. Við höfum lært af biturri reynslu að erfitt getur verið að fara út í víking og ætla að leggja vinsæla og ósigraða heimakonu að velli.
