Veltivigtarmeistari Cage Warriors, hinn danski Nicolas Dalby, hefur undirritað samning við UFC og mun keppa fyrir samtökin á næstunni. Aðeins einn annar Dani hefur barist í UFC.
Dalby keppti síðast í nóvember á síðasta ári þegar hann varði Cage Warriors beltið gegn Mohsen Bahari. Áður hafði Íslandsvinurinn Cathal Pendred haldið þeim titli en gaf hann eftir til að keppa í The Ultimate Fighter þáttaröðinni.
Nokkur óvissa hefur verið um framtíð Cage Warriors eftir að forstjóri fyrirtækisins sagði af sér í síðasta mánuði og frestuðu samtökin í kjölfarið fyrsta bardagakvöldi ársins. Framtíð Dalby í samtökunum var því í óvissu og eflaust mikill léttir fyrir hann að komast í UFC þar sem hann mun fá að keppa reglulega.
Dalby er spennandi viðbót við veltivigtarflóruna í UFC. Hann er ósigraður í 13 bardögum, gríðarlega sterkur og nokkuð höggþungur. Hann er aðeins annar Daninn sem keppir í UFC en áður hafði Martin Kampmann barist lengi í bardagasamtökunum. Fightland gerði áhugaverða stuttmynd um Nicolas Dalby árið 2013 þar sem fylgst var með undirbúningi hans fyrir bardaga gegn Morten Djursaa. Sjá má stuttmyndina hér að neðan:
