Fjölbragðaglímukappinn CM Punk mun loksins berjast sinn fyrsta bardaga í september. CM Punk mætir þá Mickey Gall á UFC 203 í Cleveland.
CM Punk, sem heitir réttu nafni Phil Brooks, samdi við UFC í byrjun árs 2014 þrátt fyrir að hafa enga reynslu í MMA. Punk gerði garðinn frægan í fjölbragðaglímunni í WWE og er stórt nafn í Bandaríkjunum.
Síðan Punk samdi við UFC hefur hann verið að æfa hjá Duke Roufus í Milwaukee. Punk hefur átt við meiðsli að stríða eftir að hann byrjaði að æfa og þurfti m.a. að fara í aðgerð á baki fyrr á árinu. Hann hefur nú fengið grænt ljós frá læknunum til að berjast og fer bardaginn fram þann 10. september.
Andstæðingur hans verður Mickey Gall (2-0) en Gall sigraði Mike Jackson í frumraun sinni í UFC í febrúar. Gall vakti athygli Dana White í þáttunum Lookin’ for a Fight þar sem hann óskaði eftir því að berjast við Punk. Eftir sigurinn á Jackson var Gall lofað að berjast við Punk.
Margir bardagaaðdáendur hafa gagnrýnt þessa ákvörðun UFC að leyfa óreyndum fjölbragðaglímumanni að berjast í UFC. Eins og áður segir er Punk með enga reynslu en ljóst að mörg augu munu beinast að honum þegar hann loksins berst. Sagan segir að Punk hafi fengið 16 æfingabardaga í bardagaklúbbi Roufus og tapað 15 þeirra.
UFC 203 stefnir í skemmtilegt bardagakvöld en í aðalbardaganum mætast þeir Stipe Miocic og Alistair Overeem um þungavigtarbeltið. Fabricio Werdum mætir Ben Rothwell sama kvöld en ekki er vitað hvort bardagi CM Punk verði á aðalhluta bardagakvöldsins.
Það kæmi mér mjög á óvart ef þessi bardagi verður að veruleika. Mér finnst miklu líklegra að CM Punk berjist aldrei í UFC.