UFC hélt stóran blaðamannafund fyrr í kvöld þar sem bardagasamtökin tilkynntu nokkra bardaga. Þar á meðal var bardagi Dominick Cruz og Urijah Faber staðfestur á UFC 199.
UFC 199 fer fram þann 4. júní og munu þeir Chris Weidman og Luke Rockhold mætast í aðalbardaga kvöldsins. Bardagi Dominick Cruz og Urijah Faber verður næstsíðasti bardagi kvöldsins.
Dominick Cruz varð aftur bantamvigtarmeistari UFC í janúar er hann sigraði T.J. Dillashaw og náði í beltið sem hann tapaði aldrei. Þeir Cruz og Faber áttu að mætast í þriðja sinn í júlí 2012 á UFC 149 en þá sleit Cruz krossbandið í fyrsta sinn. Hann var í kjölfarið frá vegna meiðsla í þrjú ár og var sviptur titlinum en hefur nú náð sér að fullu.
Þriðji bardaginn milli þeirra getur nú loksins farið fram en þetta verður fjórði titilbardagi Faber í UFC. Bardagakvöldið fer fram í Los Angeles en UFC hefur ekki staðfest fleiri bardaga á kvöldið enn sem komið er.
