Dustin Poirier og Benoit “God of War” Saint-Denis mættust í næst síðasta bardaganum á UFC 299. Bardaginn byrjaði með krafti og var á fullu blasti alveg þangað til ljósin slokknuðu.
Það kom til tals fyrir bardagann hvort að Benoit hefði fengið staph sýkingu fyrir bardagann, það var ekki að sjá, en það bar þó á örlítilli örvæntingu í bardaganum. Þessi bardagi var aldrei að fara allar 5 loturnar og sást strax að hann myndi klárast snemma.
Benoit og Dustin byrjuðu að skiptast á höggum og lentu til skiptist, Benoit þó aðeins betur enda stjórnaði hann hraðanum og sýndi mikið frumkvæði. Báðir fengu þeir skurð í fyrstu lotu. Þeir skiptust einnig á að vera dóminerandi í glímunni, en Dustin reyndi þrisvar sinnum að sækja Guillotine í fyrstu lotu. Í hvert skipti sem Benoit slapp úr takinu tók hann yfirburðarstöðu í leiðinni.
Dustin Poirier sýndi í annarri lotu að hann er aðeins betri boxari. Benoit lét höggin flæða og gerði Dustin vel í því að verja sig og slá högg á móti á fullkomnum tíma. Ekki leið að löngu fyrr en Poirier lenti krók sem small á hökunni hans Benoit og innsiglaði KO sigur.
