Jose Aldo ætlar ekki að hætta í MMA á þessu ári eins og hann hefur áður talað um. Aldo skrifaði undir nýjan samning við UFC og mun því halda áfram að berjast.
Jose Aldo sagði fyrr á þessu ári að hann ætlaði sér að hætta í MMA þegar þáverandi samningur rynni út. Aldo átti þá þrjá bardaga eftir og ætlaði að klára þá og hætta svo. Síðasti bardaginn hefði verið í haust en Dana White, forseti UFC, sagði í gær að Aldo hefði skrifað undir nýjan samning.
Aldo hefur lengi sagt að hann langi að prófa eitthvað nýtt og jafnvel berjast í boxi. Upphaflega ætlaði hann að vera hættur í MMA þegar hann yrði þrítugur en núna er hann 32 ára gamall og skrifaði undir nýjan átta bardaga samning.
Jose Aldo tapaði fyrir Alexander Volkanovski á UFC 237 í maí en fram að því hafði hann unnið tvo bardaga í röð – báða með tæknilegu rothöggi.
