Junior dos Santos er sagður hafa fallið á lyfjaprófi en þetta kom fram í tilkynningu frá UFC í gær. Nú hefur dos Santos tjáð sig um lyfjaprófið en hann heldur fram sakleysi sínu.
Brasilíumaðurinn Junior dos Santos átti að mæta Francis Ngannou á UFC 215 þann 9. september. Vegna lyfjaprófsins hefur dos Santos verið fjarlægður af bardagakvöldinu og er UFC nú að leita að nýjum andstæðingi fyrir Ngannou.
Junior dos Santos og hans lið sendu frá sér tvær yfirlýsingar í gær. „Við erum enn að reyna að átta okkur á niðurstöðum lyfjaprófsins til að sjá hvað gerðist. Við vitum hins vegar að Junior dos Santos hefur aldrei tekið frammistöðubætandi efni, aldrei vísvitandi tekið inn óleyfileg efni og alltaf stutt stefnu USADA til að halda íþróttinni hreinni,“ segir m.a. í fyrri yfirlýsingunni.
Í seinni yfirlýsingunni kom hins vegar fram hvaða efni fannst í lyfjaprófinu en USADA hafði ekki greint frá því áður. Efnið sem fannst kallast Hydrochlorothiazite og er þvagörvandi lyf. Slík lyf eru alltaf bönnuð þar sem þau eru oft notuð til að fela steranotkun.
„Við vitum ekki hvaðan þetta efni kemur. Við höfum þegar byrjað að rannsaka fæðubótarefnin hans og lyf til að sjá hvort eitthvað af þeim gætu hafa verið menguð. Jeff Novitsky og Donna Marcolini hjá UFC hafa leiðbeint okkur í þessu ferli og erum við þakklátir þeim fyrir fagmennsku þeirra,“ segir m.a. í seinni yfirlýsingunni.
Portion of a second statement from Junior dos Santos’s management on USADA situation. pic.twitter.com/kKWTiQkgsq
— Brett Okamoto (@bokamotoESPN) August 19, 2017
Ngannou var þó ekki sáttur á Twitter þegar hann sá fréttirnar í fyrstu.
I’m very very angry!!!
Almost done with training camp and they just announced that my opponent is out for #ufc215
— Francis NGannou (@francis_ngannou) August 18, 2017
Junior dos Santos hringdi þó í Francis Ngannou í gær til að biðja hann afsökunar enda gerist þetta aðeins þremur vikum fyrir bardaga þeirra. Ngannou vottaði samúð með dos Santos en sá brasilíski vonast til að málið verði leyst svo þeir geti barist síðar.
