Rousimar Palhares fékk tveggja ára keppnisbann í október í fyrra. Palhares og Venator FC láta þetta bann ekkert stoppa sig og berst Palhares á Ítalíu í kvöld.
Hinn vafasami Palhares fékk bannið í fyrra eftir að hafa enn einu sinni haldið uppgjafartaki of lengi. Í bardaga sínum gegn Jake Shields hélt hann „kimura“ takinu þrátt fyrir að Jake Shields hefði tappað út og þrátt fyrir tilraunir dómarans til að stöðva bardagann.
Palhares hefur margoft gerst sekur um slíkt áður og fékk því tveggja ára bannið. Palhares er sagður vera alvarlega greindarskertur og eru margir á því að hann eigi ekkert að vera að berjast. Venator FC er ekki á sama máli og bókaði hann í titilbardaga í kvöld gegn Norðmanninum Emil Weber Meek.
Palhares fékk tveggja ára bannið frá íþróttasambandi Nevada fylkis (NAC) og hefðu öll önnur íþróttasambönd í Bandaríkjunum fylgt sömu línu og meinað honum að berjast. En Venator FC ætlar ekki að virða keppnisbann NAC og keppir Palhares í kvöld um veltivigtartitilinn.
Það er sjaldan lognmolla í kringum bardaga Palhares og verður áhugavert að sjá bardaga hans í kvöld. Áhugasamir geta séð bardagana gegn gjaldi hér.
