Talið er að UFC muni í ár heimsækja Holland og Króatíu í fyrsta sinn. Bardagakvöldið í Hollandi mun fara fram í Rotterdam þann 8. maí en ekki í höfuðborginni Amsterdam.
Þetta kemur fram á hollensku síðunni MMAplanet.nl. UFC stefnir á að halda þrjú bardagakvöld í Evrópu á fyrri hluta ársins og er bardagakvöldið í London það eina sem hefur verið staðfest hingað til. Holland hefur alið af sér marga gríðarlega færa sparkboxara í gegnum tíðina en þrír hollenskir bardagamenn berjast í UFC í dag (Alistair Overeem, Stefan Struve og Germaine de Randamie).
Bardagakvöldið í Króatíu mun fara fram í höfuðborginni Zagreb. Bardagakvöldið gæti farið fram um sumarið en UFC óskar þess eflaust að króatíska goðsögnin Mirko ‘Cro Cop’ Filipovic væri enn að berjast. Cro Cop hætti fyrr á árinu og fékk um leið tveggja ára keppnisbann eftir að hafa viðurkennt notkun á HGH (Human Growth Hormone) við meðhöndlun á meiðslum.
Reiknað er með að bardagakvöldin verði sýnd á Fight Pass rás UFC en bardagasamtökin virðast ætla að setja meira púður í rás sína á þessu ári. Nýlega var bardagi Dustin Poirier og Joseph Duffy á Fight Pass hluta UFC 195 og svo mun bardagi Anderson Silva og Michael Bisping vera í beinni útsendingu á Fight Pass í febrúar.
