Vin Diesel staðfesti nýlega að Conor McGregor verði í nýjustu mynd sinni, xXx: The Return of Xander Cage. Í myndinni verða einnig þeir Jet Li og Samuel L. Jackson.
Þetta verður þriðja myndin í xXx seríunni og mun Vin Diesel leika aðalhlutverkið líkt og í fyrstu myndinni. Ekki er ljóst hversu veigamikið hlutverk Conor McGregor fær en auk fyrrgreindra leikara verða þau Tony Jaa og indverska leikkonan Deepika Padukone í myndinni.
Áætlað er að tökur fari fram milli apríl og júlí á þessu ári. McGregor hefur lýst því yfir að hann vilji berjast næst í apríl/maí og gæti því hafið tökur eftir sinn næsta bardaga.
Þetta verður fyrsta stórmynd McGregor og virðist hann vera að feta í fótspor Rondu Rousey sem hefur leikið í nokkrum kvikmyndum að undanförnu. Hugsanlega hefur kvikmyndaferillinn truflað bardagaferil Rousey og skulum við vona að það sama verði ekki upp á teningnum hjá McGregor.
