Formlega vigtunin fyrir UFC 264 fór fram fyrr í dag. Allt gekk upp fyrir aðalbardaga kvöldsins og litu þeir Conor McGregor og Dustin Poirier vel út á vigtinni.
Dustin Poirier mætti snemma í vigtunina og var 156 pund fyrir bardagann á morgun en leyfilegt er að vera 1 pundi yfir nema þegar um titilbardaga er að ræða. Conor McGregor var einnig 156 pund og er því allt til reiðu fyrir aðalbardagann annað kvöld.
Gilbert Burns og Stephen Thompson mætast í næstsíðasta bardaga kvöldsins í veltivigt. Báðir voru þeir 170,5 pund í dag og litu vel út í vigtuninni.
Allir bardagamenn kvöldsins náðu vigt nema Irene Aldana. Aldana var 139,5 pund fyrir bantamvigtarbardaga sinn gegn Yana Kunitskaya en bardaginn verður á dagskrá. Aldana þarf að gefa Kunitskaya 30% af launum sínum fyrir bardagann þar sem hún náði ekki vigt.
Sjónvarpsvigtunin fer svo fram kl. 23 í kvöld fyrir framan áhorfendur í T-Mobile höllinni.
